स्मृति संग्रह

आश्विन मासक शुक्लपक्ष में माँ श्री दुर्गा जीक पूजा महीनाथपुरक ज्योतिषी परिवार द्वारा प्रायः दू शताब्दी सँ अधिक समय सँ निरन्तर होइत आबि रहल अछि। श्री दुर्गा जीक पूजा एतय आश्विन शुक्लपक्ष केर पड़िव (प्रथमा तिथि) सँ विजया दशमी धरि विधिवत होइत अछि, जेना अन्यत्र होइत अछि।

मुदा एतय एकटा विशिष्ट परम्परा अछि—भगवान-भगवती सभक प्रतिमा कोजगरा, अर्थात् पूर्णिमा धरि प्रतिष्ठापित रहैत छथि। ई परम्परा अन्यत्र विरल देखबा में अबैत अछि। एतय प्रतिमा विसर्जन कोजगराक प्रात होइत अछि।

विजया दशमी धरि कलश स्थापित रहैत छथि। कलश परहक जयन्तीक वितरण परम्परानुसार विजया दशमी दिन होइत छैक। पूर्व में लोक अपन शिखा (टीक) में जयन्ती बाँधैत छलाह, मुदा वर्तमान समय में शिखा रहिते नहि अछि, जाहि कारणेँ कखनो-कखनो ओहि अवसर पर क्षोभक स्थिति बनि जाइत अछि।

दू शताब्दी पूर्व एहि परिवारक पुरुखा - स्व. रामचन्द्र झा, कृष्णचन्द्र झा, विन्ध्य नाथ झा,रमानाथ झा, अभय नाथ झा, कमल नाथ झा, मेधा नाथ झा आ हुनकर पूर्वज लोकनि—अपन दलान पर सामूहिक रूपेँ मूर्ति निर्माण कऽ भगवतीक पूजा आरम्भ कयलन्हि।

जगत्जननी माँ श्री दुर्गा जीक कृपा आ आशीर्वाद सँ ई पूजा परम्परा एखनहुँ धरि सुचारु रूपेँ चलि रहल अछि।

कहल जाइत अछि जे एहि परिवारक एक पुरुखा केँ स्वयं माँ दुर्गे दर्शन देने छलथिन्ह। एहि स्थान पर श्री दुर्गा जीक प्राण-प्रतिष्ठा पश्चात् विधिवत पूजा होइत अछि।

एक बेर एहि ज्योतिषी परिवारक एक सदस्य केँ श्री दुर्गा जी अपन उपस्थिति केर प्रमाणस्वरूप मूर्ति में अपन जीभ केर दर्शन करौलन्हि। समय-समय पर परिवारक विभिन्न सदस्यक अनुभवक आधार पर एहन मान्यता बनैत रहल अछि जे एहि परिवार पर माँ दुर्गा जीक विशेष कृपा आ आशीर्वाद प्राप्त अछि।

मिथिला में दुर्गा पूजाक समय गामे-गाम नाटक मंचनक परम्परा छल, आ महीनाथपुरो एकर अपवाद नहि रहल। राजा हरिश्चन्द्र नाटक में राजा हरिश्चन्द्र केर भूमिका में स्व. नागेन्द्र चौधरी जीक अभिनय सम्पूर्ण इलाका में प्रसिद्ध छल।

नाटकक अन्तिम दृश्य में हुनकर अभिनय दर्शक सभक आँखि नोर सँ भरि दैत छल। प्रायः प्रत्येक वर्ष एहि नाटकक मंचन केर माँग रहैत छल।

एहि संग-संग अन्य सांस्कृतिक कार्यक्रम—घोड़ा दौड़, हाथी दौड़, आ विभिन्न लोक उत्सव—भी आयोजित होइत रहल। दशमी सँ कोजगरा धरि दुपहरिया समय मेला लगैत छल, जे सम्पूर्ण क्षेत्र लेल आकर्षणक केन्द्र रहैत छल।